“Formula 1” üzrə Azərbaycan Qran-Prisinin müddəti daha beş il uzadılıb. Bakı Şəhər Halqasının yaydığı məlumata görə, yeni anlaşmaya əsasən, paytaxt Bakıda yarışlar 2030-cu ilə qədər davam edəcək.
Azərbaycan ilk dəfə 2016-cı ildə “Formula 1” yarışına ev sahibliyi etmək üçün müqavilə imzalayıb. Sonuncu dəfə Qran-Pri bu ilin sentyabrın 19–21-də Bakının mərkəzi küçələrində təşkil olunub. Bu il də şəhərin mərkəzi küçələrində dəmir barmaqlıqlar, piyadalarla yolun hərəkət hissəsini ayıran beton plitələr quraşdırılıb. Yarışların keçiriləcəyi günlərdə isə nəqliyyatın intensiv olduğu əsas yollarda hərəkət məhdudlaşdırılıb. Bəzi məktəblərdə dərslər isə onlayn keçirilib.
Rəsmi açıqlamalara görə, ötən il dövlət büdcəsindən “Formula 1” Azərbaycan Qran-Prisi üçün 168 milyon manat vəsait ayrılıb. Lakin iqtisadçılar yarışın xərc və gəlirlərində şəffaflığın olmamasını vurğulayır və dəqiq qiymətləndirmənin mümkün olmadığını bildirirlər. Bakı Şəhər Halqası əməliyyat şirkəti də ayrılan vəsaitin konkret məbləği barədə məlumatın onlarda olmadığını qeyd edib.
İctimaiyyət arasında yarışların keçirilməsi ilə bağlı müxtəlif narazılıqlar səslənsə də, hökumət “Formula 1”in dövlət üçün strateji və iqtisadi baxımdan əhəmiyyətli olduğunu bəyan edir.
— AbzasMedia (@AbzasMedia) Sep 22, 2025
Categories